අවසන් ලියුමයි ඔබට ලියන්නේ

අවසන් ලියුමයි ඔබට ලියන්නේ

විරහා කඳුළු රැඳි පෑනෙන්

කියවා හැඬුවත් මට නම් කම් නැ

මගෙ හිත අද තද නින්දේ

එයා පැලැන්දූ මංගල මුදුවේ

ආඩම්බරකම මම දුටිමී

ගෙල වට කරගෙන ළමැදේ ලගිනා

මංගල මාලය මම දුටිමී

අබරණ අන්දන රන්වන් විහිලුව

සදාතනික ආදරය නොවේ

කියවා හැඬුවත් මට නම් කම් නැ

මගෙ හිත අද තද නින්දේ

පෑන තවත් දේ ලියන්න කීවත්

මොනවා ලියන්නද මීට වඩා

මේ ගැන අන් කිසිවෙකු නැහැ දන්නේ

වෙන දීගෙක ගිය ඔබට වඩා

අබරණ අන්දන රන්වන් විහිලුව

සදාතනික ආදරය නොවේ

කියවා හැඬුවත් මට නම් කම් නැ

මගෙ හිත අද තද නින්දේ

මේ ගීතය ලියවුණු රසවත් කතාව මේකයි. එවකට ගුවන් විදුලියේ සරල ගී වැඩසටහනක් සඳහා ෂෙල්ටන් පෙරේරා මහතාට ගීත හතරක් නිර්මාණය කරන්නට අවශ්‍ය වී තිබුණා. නමුත් එතුමා හදාගෙන තිබුණේ ගීත තුනක් පමණයි. පටිගත කිරීමට ගිය විට තමයි එතුමාට තවත් ගීතයක් අවශ්‍ය බව දැනගත්තේ.

මේ වෙනකොට ඩෝල්ටන් අල්විස් මහතා ගුවන් විදුලි සංස්ථාවේ ආපන ශාලාවේ ඉඳලා තියෙනවා. ෂෙල්ටන් පෙරේරා මහතාගේ බිරිඳ වන ශෂී පෙරේරා මහත්මියත් එවකට ගුවන් විදුලි සංස්ථාවේ හින්දි සේවයේ නිවේදිකාවක් ලෙස සේවය කරනවා. වහාම තම බිරිඳට ෂෙල්ටන් පෙරේරා මහතා කියනවා, "ශෂී, ඩොටී ඉන්නවා කැන්ටිමේ. ඉක්මනට ගිහින් සිංදුවක් ලියවා ගෙන එන්න" කියලා.

සැමියාගේ ඉල්ලීමට වහාම ආපන ශාලාව වෙත දිව යන ශෂී පෙරේරා මහත්මිය ඩෝල්ටන් අල්විස් මහතාට කාරණය කියනවා. ඒ අවස්ථාවේ දී ඩෝල්ටන් අල්විස් මහතා තම සාක්කුවේ තිබුණු සිගරට් පෙට්ටිය අරගෙන එහි ඊයම් කොලය අනික් පැත්තට හරවා ක්ෂණිකව මේ පද මාලාව ලියනවා. ඒ පද මාලාව ලැබුණු ෂෙල්ටන් පෙරේරා මහතා ක්ෂණිකව තනු නිර්මාණය කර වාදක මණ්ඩලයට "ඔයා මේ වෙලාවට මේ කොටස වාදනය කරන්න" යනුවෙන් උපදෙස් දී ගීතය වාදනය කරවමින් ගායනා කරනවා.

ක්ෂණිකව නිර්මාණය වුණත් මේ ගීතය අදටත් ජනප්‍රියයි. පසුකාලීනව ෂෙල්ටන් පෙරේරාවන්ගේ පුත් සතිෂ් පෙරේරා විසින් නව සංගීත සංයෝජනයක් සහිතව මේ ගීතය තාරුණ්‍යය අතරටත් ගෙනාවා.